ဒုတိယပင်လုံ (သို့မဟုတ်) ပြည်သူ့လွှတ်တော် ကိုယ်စားပြုကော်မတီ (စီအာပီပီ)

ဆောင်းပါးရှင် - ရာဇာဓိရာဇ် (၃၀-၉-၀၈) (ခေတ်ပြိုင် ၀က်ဘ်ဆိုဒ်မှ ကူးယူဖော်ပြပါသည်။)

ပြည်သူ့လွှတ်တော်ကိုယ်စားပြုကော်မတီသည် ၁၉၉ဝ ပြည့်နှစ် ရွေးကောက်ပွဲတွင် အနိုင်ရနိုင်ငံရေးပါတီများမှ ပြည်သူ့ လွှတ်တော်ကိုယ်စားလှယ်များဖြင့် ပူးပေါင်းဖွဲ့စည်းထားသော အဖွဲ့ဖြစ်သည်။ စီအာပီပီ၏ အဓိကရည်မှန်းချက်သည် ပြည်သူ့လွှတ်တော် မပေါ်ပေါက်မီကာလအတွင်း လွှတ်တော်ကဲ့သို့ နိုင်ငံရေးကိစ္စ အဝဝကို လုပ်ကိုင်ဆောင်ရွက်ရန် ဖြစ်သည်။ ၁၆၊ ၉၊ ၂ဝဝ၈ ခုနှစ်တွင် စီအာပီပီ ဖွဲ့စည်းခဲ့သည့်သက်တမ်းမှာ (၁ဝ) နှစ်ပြည့်ခဲ့ပြီဖြစ်သည်။

၂ဝဝ၄ ခုနှစ်၊ ဒီဇင်ဘာလက ကျွန်ုပ် နယ်သာလန်နိုင်ငံတွင် ရှိနေစဉ် ပြင်သစ်နိုင်ငံ၊ ပါရီမြို့၌ ဦးနွယ်အောင် ဦးစီးသော ဘားမားဖိုရမ်အဖွဲ့နှင့် ဥရောပရောက်မြန်မာနိုင်ငံသားများ မြန်မာ့နိုင်ငံရေးအတွက် တွေ့ဆုံဆွေးနွေးပွဲကျင်းပခဲ့ပါသည်။ ယင်းအစည်းအဝေးသို့ ပြည်ထောင်စုမြန်မာနိုင်ငံ အမျိုးသားညွန့်ပေါင်းအစိုးရ (အန်စီဂျီယူဘီ) ဝန်ကြီးချုပ် ဒေါက်တာ စိန်ဝင်းလည်း တက်ရောက်ခဲ့ပါသည်။ ယင်းအစည်းအဝေး၌ လွှတ်တော်ကိုယ်စားပြုကော်မတီ ဖွဲ့စည်းခြင်း အကြောင်းကို ကျွန်ုပ်တင်ပြဆွေးနွေးခဲ့ပါသည်။ စီအာပီပီသည် မြန်မာ့နိုင်ငံရေးတွင် အဓိက အရေးကြီးဆုံးသော နိုင်ငံရေးတပ်ပေါင်းစု အဖွဲ့ဖြစ်၍ မည်သို့စတင် ကြိုးစားခဲ့ကြောင်း သမိုင်းဖြစ်ရပ်မှန်ကို အများသိရှိရန် မဂ္ဂဇင်း (သို့မဟုတ်) ဂျာနယ်တခုခုတွင် ရေးသားဖော်ပြရန် နိုင်ငံရေးတက်ကြွသော လူငယ်အချို့က အကြံပြုခဲ့သည်။

နဝတအစိုးရသည် ၁၉၉ဝ ပြည့်နှစ် ရွေးကောက်ပွဲပြီးပါက အနိုင်ရနိုင်ငံရေးပါတီများအား အာဏာအပ်နှင်းပြီး ၎င်းတို့၏ စစ်တန်းလျားသို့ ပြန်မည်။ အခြေခံဥပဒေကို ပြည်သူ့ကိုယ်စားလှယ်များကသာ ရေးဆွဲရမည်။ ပြည်သူ့အာဏာကို ပြည်သူ့ လက်ဝယ်သို့ မြန်နိုင်သမျှ မြန်မြန်အပ်မည်ဟုဆိုခဲ့ပါသည်။ ၁၉၉၃ ခုနှစ် ၌ စစ်အစိုးရက အမျိုးသားညီလာခံ ကျင်းပပေး ခဲ့သည်။ ယင်းညီလာခံတွင် ပြည်သူ့ကိုယ်စားလှယ်အချို့နှင့် စစ်အစိုးရ စိတ်ကြိုက်ကိုယ်စားလှယ် အများစု ပါဝင်သည်။

ယင်းညီလာခံတွင် စစ်အစိုးရ ချမှတ်ထားသော အခြေခံမူ (၆) ချက်နှင့် အသေးစိတ်အခြေခံမူ (၁ဝ၄) ချက်ကိုသာ ဆွေး နွေးခွင့်ရှိသည်။ ပြည်သူ့ကိုယ်စားလှယ်များ တင်ပြသော မည်သည့်ဆွေးနွေးချက်ကိုမဆို ညီလာခံကော်မရှင်က ပယ်ချခဲ့ သည်။ အကြောင်းအမျိုးမျိုးပြပြီး ညီလာခံကို ခဏခဏ ရပ်နားနေသည်မှာ စစ်အစိုးရ အချိန်ဆွဲနေခြင်းနှင့် နိုင်ငံရေး လက်ဝါးကြီးအုပ်နိုင်ရန် ကျားကွက်ရွှေ့နေခြင်းသာဖြစ်သည်။ ထို့ကြောင့် အန်အယ်လ်ဒီကိုယ်စားလှယ်နှင့် တချို့ တသီး ပုဂ္ဂလအမတ်တို့က ကျေနပ်မှုမရှိ၍ ညီလာခံမှ နုတ်ထွက်ရန် အခြေအနေတခုကို စောင့်နေကြသည်။

၁၉၉၅ ခုနှစ်တွင် ဒေါ်အောင်ဆန်းစုကြည် နေအိမ်အကျယ်ချုပ်မှ လွတ်လာသည်နှင့် ညီလာခံသို့ တက်ရောက်နေသော အန်အယ်လ်ဒီမှ ပြည်သူ့လွှတ်တော်ကိုယ်စားလှယ်များလည်း ညီလာခံမှ နုတ်ထွက်ခဲ့ကြသည်။ စစ်အစိုးရ ကျင်းပသော အမျိုးသားညီလာခံလည်း ခေတ္တခဏ ရပ်ဆိုင်းသွားခဲ့သည်။ အန်အယ်လ်ဒီသည် လူမျိုးစု နိုင်ငံရေးပါတီများနှင့် တပ်ပေါင်းစု ဖွဲ့နိုင်ပါက အလွန်အင်အား တောင့်တင်း လာမည်ဖြစ်၍ လူမျိုးစုနိုင်ငံရေးပါတီများနှင့် တပ်ပေါင်းစုဖွဲ့ရေးကို ဒေါ်အောင်ဆန်းစုကြည် အနေဖြင့် ဆန္ဒပြင်းပြနေသည်။ မွန်အမျိုးသားဒီမိုကရေစီအဖွဲ့မှ ခေါင်းဆောင်များဖြစ်ကြသည့် နိုင်ငွေသိန်းနှင့် နိုင်ထွန်းသိန်းတို့ကို နှစ်ရှည်ထောင်ဒဏ်များ ချမှတ်ခဲ့ရာမှ ဒေါ်အောင်ဆန်းစုကြည်နှင့် မရှေးမနှောင်းတွင် ပြန်လည် လွတ်လာသည်။

ပါတီဖျက်သိမ်းခံထားရသော မွန်အမျိုးသားဒီမိုကရေစီ အဖွဲ့အနေဖြင့် ရှေ့သို့ ခရီးဆက်နိုင်ရန် နိုင်ငံရေး ပါတီကြီးများ ဖြစ်ကြသော ရခိုင်၊ ဇိုမီးနှင့် ရှမ်းအမျိုးသား ဒီမိုကရေစီအဖွဲ့တို့ကို စည်းရုံးပြီး အန်အယ်လ်ဒီနှင့်ပူးပေါင်း၍ တပ်ပေါင်းစုဖွဲ့ရန် လိုအပ်မည်ဖြစ်ရာ မွန်အမျိုးသားဒီမိုကရေစီအဖွဲ့သည် (၁၂၊ ၁၂၊ ၁၉၉၅) ရက်နေ့တွင် ဗဟိုကော်မတီ အချို့ တွေ့ဆုံဆွေးနွေးဆုံးဖြတ်ချက်အရ တပ်ပေါင်းစုဖွဲ့ရေး မဟာဗျူဟာတရပ် ချမှတ်ခဲ့ကြပါသည်။ ထိုကြောင့် စီအာ ပီပီသည် ၁၉၉၅ ခုနှစ်မှာပင် သန္ဓေတည်လာသည်ဟု ဆိုရပေမည်။

ရန်ကုန်မြို့ရှိ ဦးသာဘန်းအား နိုင်ငွေသိန်းနှင့် ကျွန်ုပ်တို့သွားရောက်တွေ့ဆုံပြီး မွန်အမျိုးသားဒီမိုကရေစီအဖွဲ့မှ ချမှတ်ခဲ့ သော အစီအစဉ်ကို တင်ပြဆွေးနွေးခဲ့ကြပါသည်။ စစ်အစိုးရနှင့် ထိပ်တိုက်ရင်ဆိုင်မှု Confrontation အစီအစဉ်ဖြစ်၍ အလွန်အန္တရာယ်များသောကိစ္စဟု ဦးသာဘန်းက ဆိုပါသည်။ ယင်းအချိန်တွင် မြန်မာနိုင်ငံအနေဖြင့် အာဆီယံအဖွဲ့ဝင် ဖြစ်ရန် စစ်အစိုးရက ခြေလှမ်းပြင်နေသည့် ကာလဖြစ်၍ နိုင်ငံရေး ပါတီများ ပူးပေါင်းပြီး အစိုးရတရပ်ဖွဲ့မည်ကို သူတို့ အလွန်စိုးရိမ်နေကြပါသည်။ နဝတ၏ စစ်ထောက်လှမ်းရေး များက လူမျိုးစု ခေါင်းဆောင်များ၏ အသွားအလာကို မျက်ခြည်မပြတ် စောင့်ကြည့်နေပြီး အန်အယ်လ်ဒီ ပါတီနှင့် မပူးပေါင်းရန်၊ ဒေါ်အောင်ဆန်းစုကြည်ကို ထောက်ခံခြင်းမပြုရန်၊ လူမျိုးစု နိုင်ငံရေးပါတီ ခေါင်းဆောင်များအား ခဏခဏ ခေါ်ယူသတိပေးနေသည်။

ထို့နောက် ရခိုင်အမျိုးသားဒီမိုကရေစီအဖွဲ့အား ရှင်းပြရန် ဦးသာဘန်းက တာဝန်ယူမည်ဟုပြောပါသည်။ သူတို့အဖွဲ့ သဘောတူညီမှုရရှိခဲ့ပြီးသောအခါ ဦးသာဘန်း၊ နိုင်ငွေသိန်းနှင့် ကျွန်ုပ်တို့ (၃) ယောက်လည်း ချင်းအမျိုးသား (ဇိုမီး ကွန်ဂရက်) နှင့် တွေ့ဆုံဆွေးနွေးပြန်သည်။ မကြာမီကာလအတွင်း ဇိုမီးကွန်ဂရက် အဖွဲ့လည်း ယင်းကိစ္စကို သဘောတူ လက်ခံကြောင်း ကျွန်ုပ်တို့ထံ အကြောင်းပြန်ကြားခဲ့ပါသည်။ ၁၉၉၆ ခုနှစ် တနှစ်အတွင်းမှာ ကျွန်ုပ်တို့သည် မွန်၊ ရခိုင်၊ ချင်း (ဇိုမီး) နိုင်ငံရေးပါတီများကို စုစည်းနိုင်ခဲ့သည်။ (၁၂၊ ၂၊ ၁၉၉၇) တွင် အန်အယ်လ်ဒီဦးဆောင်ကျင်းပသော ပြည်ထောင်စု နေ့၌ တက်ရောက်လာကြသော လူမျိုးစု ခေါင်းဆောင်များကို ဟိုတယ်တခုတွင် ထမင်းလက်ဆုံစားရင်း၊ စီအာပီပီ ဖွဲ့စည်းရန်ကိစ္စကို ရှမ်းအမျိုးသား ခေါင်းဆောင် ဦးစိုင်းညွန့်လွင်နှင့် ဆွေးနွေးခဲ့ရာ ဥက္ကဋ္ဌ ဦးခွန်ထွန်းဦးနှင့် တိုင်ပင်ပြီး အဖြေပေးမည်ဟု ပြောပါသည်။

ရှမ်းအမျိုးသားဒီမိုကရေစီအဖွဲ့ အက်စ်အန်အယ်လ်ဒီသည် ၁၉၉ဝ ရွေးကောက်ပွဲ၌ အမတ် (၂၃) ဦး ရရှိထားသော အဖွဲ့ ဖြစ်၍ တိုင်းရင်းသားလူမျိုးစုအဖွဲ့များအနက် အင်အားအကောင်းဆုံးသော နိုင်ငံရေးအဖွဲ့တခုဖြစ်ပါသည်။ ပြည်ထောင်စု တိုင်းရင်းသားများ ဒီမိုကရေစီအဖွဲ့ချုပ် (ယူအန်အယ်လ်ဒီ) အဖွဲ့မဝင်ဘဲ တသီးတခြား ရပ်တည်နေသော အဖွဲ့လည်းဖြစ် သည်။ ရှမ်းတို့က အန်အယ်လ်ဒီပါတီအား သံသယမျက်လုံးနှင့် ကြည့်နေသောအဖွဲ့လည်းဖြစ်၍ တပ်ပေါင်းစုတွင် ပါဝင်ပါ့ မလားဟု ကျွန်ုပ်တို့က စိုးရိမ်နေကြသည်။ ဦးစိုင်းညွန့်လွင်နှင့် ဒုတိယအကြိမ် တွေ့သည့်အခါတွင်မူ ဦးခွန်ထွန်းဦးမှ သဘောတူကြောင်း၊ သို့သော် ရှမ်းပြည်ရှိ ၎င်းအဖွဲ့ဝင်များ၏ သဘောတူညီမှု ရယူပြီးမှ ၎င်းကိစ္စ ဆောင်ရွက်နိုင်မည် ဖြစ်၍ ဒီနှစ်မကုန်မီ ရှမ်းပြည်သို့တက်ရန် သူကြိုးစားမည်ဟုဆိုသည်။

ကျွန်ုပ်သည် ၁၉၉၇ ခုနှစ် စက်တင်ဘာလ၏ ရက်တရက်တွင် ကိုးမိုင်ဘက်သို့ ခရီးကြုံရင်း စိုင်းညွန့်လွင်အိမ်ကို ဝင်ကြည့် ရာ သူရှမ်းပြည်မှ ပြန်ရောက်နေပြီဖြစ်ကြောင်း သိရပါသည်။ သူတို့၏ ကိုယ်စားလှယ်များနှင့် ညှိနှိုင်းရာတွင် အားလုံး သဘောတူညီမှုရပြီဖြစ်၍ နောက် (၂) ပတ်ခန့်အကြာတွင် ရန်ကင်းရှိ နိုင်ငွေသိန်း၏ ခြံတွင် တွေ့ဆုံကြပါသည်။ ယင်းကိစ္စ မအောင်မြင်မီ ထောက်လှမ်းရေးမှ သိရှိမည်ကို ဦးခွန်ထွန်းဦးက အလွန်စိုးရိမ်နေသည်။ အမျိုးသားဒီမိုကရေစီ အဖွဲ့ချုပ်နှင့် ဆက်သွယ်နိုင်ရန် ကြားလူအဖြစ် ဦးခင်မောင်ကြည် (အန်အယ်လ်ဒီ) ကို ရွေးချယ်ကြပါသည်။

ဦးခင်မောင်ကြည်၏ စီစဉ်ပေးမှုကြောင့် (၅၁) နှစ်မြောက် ပြည်ထောင်စုနေ့တွင် ဒေါ်အောင်ဆန်းစုကြည်၏ နေအိမ်၌ တပ်ပေါင်းစုဖွဲ့ရန် လျှို့ဝှက်တွေ့ဆုံ ဆွေးနွေးနိုင်ခဲ့သည်။ ယင်းတွေ့ဆုံပွဲတွင် ဦးစောမရအောင်၊ ဦးအေးသာအောင်၊ ဦးအုန်းတင်၊ ဦးသာဘန်း (ရခိုင်အမျိုး သားဒီမိုကရေစီအဖွဲ့)၊ ဦးပူကျင့်ရှင်းထန်နှင့် ၎င်း၏ အတွင်းရေးမှူး (ဇိုမီးကွန်ဂရက်)၊ ဦးခွန်ထွန်းဦး၊ ဦးစိုင်းညွန့်လွင် (ရှမ်းအမျိုးသားဒီမိုကရေစီအဖွဲ့)၊ ဦးခွန်ထီး (ပင်လုံစာချုပ်လက်မှတ်ရေး ထိုးသူ)၊ ကျွန်ုပ် အပါအဝင် နိုင်ထွန်းသိန်း၊ နိုင်ငွေသိန်း၊ ဒေါက်တာမင်းစိုးလင်း (မွန် အမျိုးသားဒီမိုကရေစီအဖွဲ့)၊ ဦးအောင်ရွှေ၊ ဦးလွင်၊ ဦးစိုးမြင့်၊ ဒေါ်အောင်ဆန်းစုကြည် (အန်အယ်လ်ဒီ) တို့ ပါဝင်ဆွေးနွေးကြသည်။

ဇိုမီးကွန်ဂရက်မှ (၂ဝ၊ ၂၊ ၉၈) ရက်တွင် ချင်းအမျိုးသားနေ့ကို ချင်းရွှေရည် ဟိုတယ်တွင် ကျင်းပပါသည်။ ယင်းအမျိုးသားနေ့သို့ ကျွန်ုပ်တို့အဖွဲ့ (၄) ဖွဲ့မှ ခေါင်းဆောင်များအားလုံး တက်ရောက်ပါသည်။ ဦးတင်ဦး၊ ဒေါ်အောင်ဆန်းစုကြည်တို့လည်း တက်ရောက်လာသောကြောင့် စစ်အစိုးရက ယင်းဟိုတယ်အား အကန့်အသတ်မရှိ ပိတ်ပင်ခဲ့သည်။ လူ မျိုးစု များအား ဒေါ်အောင်ဆန်းစုကြည်ကို လက်မခံရန်နှင့် မပူးပေါင်းရန် စစ်အစိုးရက အချက်ပြလိုက်ခြင်းပင်ဖြစ်သည်။ အန်အယ်လ်ဒီက ကျင်းပသော (၅၁) ကြိမ်မြောက် တော်လှန်ရေးနေ့တွင် ဦးလွင်တို့အိမ်၌ ဒုတိယအကြိမ် ကျွန်ုပ်တို့ တပ်ပေါင်းစုဖွဲ့ရန် တွေ့ဆုံ ဆွေးနွေးနိုင်ခဲ့သည်။ ထိုညတွင် ဗိုလ်မှူးအောင်၏ ဖက်ဆစ်တော်လှန်ရေးနေ့ ဧည့်ခံကျွေးမွေး ပွဲတွင်လည်း ဒေါ်အောင်ဆန်းစုကြည်နှင့်အတူ ကျွန်ုပ်တို့အဖွဲ့အားလုံး တက်ရောက်ခဲ့သည်။

အမျိုးသားဒီမိုကရေစီအဖွဲ့ချုပ်မှ ကျင်းပသည့် (၂၇၊ ၅၊ ၉၈) နေ့ (၈) နှစ်မြောက် ရွေးကောက်ပွဲနေ့တွင် ကျွန်ုပ်တို့အဖွဲ့ တတိယအကြိမ် ဒေါ်အောင်ဆန်းစုကြည်နေအိမ်တွင် တွေ့ဆုံပြီး တပ်ပေါင်းစုဖွဲ့ရန် ဆုံးဖြတ်ချက် ချမှတ်နိုင်ခဲ့သည်။ တပ်ပေါင်းစုဖွဲ့ရန်လည်း ဒေါ်အောင်ဆန်းစုကြည်အား တာဝန်ပေးအပ်ခဲ့သည်။ အဘယ်ကြောင့်ဆိုသော် ယင်းအချိန်တွင် ထောက်လှမ်းရေးမှ ကျွန်ုပ်တို့အဖွဲ့နှင့် အန်အယ်လ်ဒီအဖွဲ့တို့က တစုံတခုသော နိုင်ငံရေးဆောင်ရွက်မှု စီစဉ်နေသည်ကို ရိပ်မိနေပြီဖြစ်သောကြောင့် ကျွန်ုပ်တို့ အဖွဲ့နောက် ကိုလည်း ထက်ကြပ်မကွာ လိုက်လံထောက်လှမ်းလျက်ရှိနေရာ ဒေါ်အောင်ဆန်းစုကြည်နှင့် ကျွန်ုပ်တို့အဖွဲ့ နောက်ထပ်တွေ့ဆုံရန် အခွင့်အလမ်း နည်းနေပြီဖြစ်သည်။ ထိုကြောင့် တပ်ပေါင်းစုဖွဲ့ရေးကို ဒေါ်အောင်ဆန်းစုကြည်အား လွှဲအပ်ပေးခဲ့သည်။ နိုင်ငံရေးပါတီများ ညီညွတ်မှု စုစည်းနိုင်သည်ကို ဒုတိယ ပင်လုံဟု ဒေါ်အောင်ဆန်းစုကြည်ကဆိုသည်။

နိုင်ငံရေးပါတီများ စုရုံးနေသည်ကို စုံစမ်းရန် အမှတ် (၇) စစ်ထောက်လှမ်းရေး နယ်မြေမှူးသည် နိုင်ထွန်းသိန်းထံ လာပြီး မေးမြန်းပါသည်။ အန်အယ်လ်ဒီနှင့် နိုင်ငံရေးကိစ္စ ဆွေးနွေးခြင်းဖြစ်သည်ဟု ဖြေဆိုခဲ့ကြောင်းသိရပါသည်။ နောက် (၂) ပတ်ခန့်အကြာတွင် ကျွန်ုပ်အား ထောက်လှမ်းရေးမှ စုံစမ်းရှာဖွေ နေကြောင်းကို မွန်ပြည်သစ်ပါတီမှ ရဲဘော်တဦးက ကျွန်ုပ်ထံသို့  အကြောင်းကြားပါသည်။ နောက်မကြာမီတွင် ဦးသာဘန်းကို ထောင် (၁ဝ) နှစ်၊ ကြားခံဆက်သွယ် ဆောင်ရွက်ပေးသူ ဦးခင်မောင်ကြည်ကိုလည်း ထောင် (၁ဝ) နှစ် ချမှတ်ခဲ့သည်။

နိုင်ငွေသိန်းအား မွန်ပြည်သစ်ကို ဝေဖန် သည်ဟုဆိုပြီး ထောင် (၇) နှစ်ချမှတ်ခဲ့သည်။ နိုင်ငွေသိန်းနှင့်အတူ ဒေါက်တာ မင်းစိုးလင်း၊ ဒေါက်တာ မင်းကြည်ဝင်း တို့ကိုလည်း ထောင်ဒဏ် (၇) နှစ်စီ ချမှတ်ခဲ့သည်။ တပ်ပေါင်းစုဖွဲ့ရန် စစ်ထောက်လှမ်းရေးမှ သတင်းရရှိသွားပြီဖြစ်၍ အချိန်တိုအတွင်း ဒေါ်အောင်ဆန်းစုကြည်က (၁၆၊ ၉၊ ၉၈) နေ့တွင် အန်အယ်လ်ဒီနှင့် မွန်အမျိုးသားဒီမိုကရေစီအဖွဲ့၊ ရှမ်းအမျိုးသားဒီမိုကရေစီအဖွဲ့၊ ရခိုင်အမျိုးသားဒီမိုကရေစီအဖွဲ့၊ ချင်း ဇိုမီးကွန်ဂရက်စသော နိုင်ငံရေးပါတီများ ပူးပေါင်းပြီး ပြည်သူ့လွှတ်တော် ကိုယ်စားပြုကော်မတီ (စီအာပီပီ) ဖွဲ့စည်းကြောင်း ကြေညာခဲ့သည်။

စီအာပီပီကို ဤသို့ အခက်အခဲများစွာနှင့် ဖြစ်မြောက်သည်အထိ အကောင်အထည်ဖော် ဆောင်ရွက်ခဲ့ကြောင်း ဖြစ်ရပ်မှန် သမိုင်းကြောင်းအား လူအများသိရှိနိုင်ရန် မှတ်တမ်းတင်အပ်ပါသည်။ ပြည်သူ့လွှတ်တော် ကိုယ်စားပြုကော်မတီသည် လွှတ်တော်ကိုယ်စားလှယ် (၂၅၁) ဦး၏ လုပ်ပိုင်ခွင့်အာဏာ Mandate ကို ရရှိထားသည်ဖြစ်၍ လွှတ်တော်တရပ်ကဲ့သို့ အာဏာစက်ရှိသောအဖွဲ့ဖြစ်ပေသည်။