ညီညွတ်ဖို့ လိုပြီ
စာဖတ်ပရိသတ်များခင်ဗျား-
ကျွန်တော့် အီးမေးလ်ကို ပို့လာတဲ့ ကိုအောင်တင်ရဲ့  အလေးအနက် စကားလေးတွေကို နှစ်သစ်ကူး လက်ဆောင်အဖြစ် ကျွန်တော် ကိုဖိုးတရုတ်မှ တင်ပြပေးလိုက်ပါတယ်။ ကျွန်တော်တို့ အားလုံး ရည်မှန်းတဲ့ လွတ်လပ်ပြီး သာတူညီမျှ အေးချမ်းသော ဒီမိုကရေစီ နိုင်ငံတော်ကြီးကို ရောက်ရှိဖို့ စည်းလုံးညီညွတ်စွာ ချီတက်နိုင်ကြစေရန် နှစ်သစ်ကူး ဆုတောင်းရင်း အခုလို ပေးပို့လာသော ကိုအောင်တင်အား ကျေးဇူးတင် ရှိကြောင်း ပြောကြားလိုက်ပါတယ် ခင်ဗျား။
လုပ်ဖေါ်ကိုင်ဘက် ရဲဘော်များ၊ ခေါင်းဆောင်များခင်ဗျား -
ဗိုလ်မှူးချစ်ကောင်းရဲ့ အနှစ် နှစ်ဆယ်ဆိုတဲ့ စာအုပ်လေးထဲမှာ စစချင်း စာကြောင်းတစ်ကြောင်းက ‘‘တိုင်းပြည် အတွက် အနှစ်နှစ်ဆယ် လုပ်ခဲ့ပြီးနောက် ကိုယ့်ကိုကိုယ် ပြန်ကြည့်လိုက်တဲ့အခါ ကြိုးတိုက်ထဲမှာ ရောက်နေတယ် ဆိုတာဖြစ်ပါတယ်။
အကျအဆုံးများစွာနဲ့ ယနေ့တိုင် ပန်းတိုင်ကို မရောက်နိုင်သေးဘဲ ဖြတ်သန်းနေရဆဲ ဖြစ်တဲ့ အနှစ်နှစ်ဆယ် ကာလဟာ ကျနော်တို့အားလုံး ကိုယ့်လက်ရှိအခြေအနေကို အစကနေ အဆုံးတိုင် ပြန်လည် သုံးသပ်ကြဖို့ အင်မတန်လုံလောက်တဲ့ ကာလမှတ်တိုင်တစ်ခု ဖြစ်တယ်ဆိုတာကို ငှက်ကုလားအုပ်လို သဲပုံထဲ မိမိဦးခေါင်းကို နှစ်မြှုပ်ပြီး ငြင်းချင်သူတွေရှိလျှင် အာဂလူသားပေဘဲ။
အနှစ် နှစ်ဆယ်ဆင်နွှဲပြီးလို့ မအောင်မြင်သေးတဲ့ အလုပ်ကို ပြန်လည် မသုံးသပ်ဘူး၊ ချို့ယွင်းအားနဲချက်ကို မရှာဘူး၊ လုပ်နည်းလုပ်ဟန် မပြင်ဘူး၊ မူပိုင်းဆိုင်ရာမှာ အားနဲချက်တွေ၊ ချွတ်ချော်ချက်တွေ ရှိနေသလား၊ လူပိုင်းဆိုင်ရာမှာ အားနဲချက်တွေ၊ ချွတ်ချော်ချက်တွေ ရှိနေသလားဆိုတာကို မသုံးသပ် မပြင်ဆင်ဘဲ အရင် အနှစ် နှစ်ဆယ်ကလို ပိုနေမြဲ ကျားနေမြဲနေကြ လုပ်ကြဖို့သာ အာရုံရှိနေကြမယ်ဆိုရင် ယုိုသူမရှက် မြင်သူရှက်စရာပါ။
ဘယ်သူတွေမှာ တာဝန်ရှိပါသလဲ။ ကျနော်တို့ အားလုံးမှာ တာဝန်ရှိပါတယ်။ ခေါင်းဆောင်မှု မြင့်လေလေ တာဝန် ပိုခံရလေလေ တာဝန်ပိုကြီးလေလေ ဖြစ်ပါတယ်။ ပြည်တွင်းက အချုပ်အနှောင် ခံနေရဆဲဖြစ်တဲ့ ခေါင်းဆောင်ကြီးငယ်တွေကလွဲရင် ပြည်တွင်းလဲ ပြည်တွင်းအလျောက် ပြည်ပလဲ ပြည်ပအလျောက် အဖွဲ့အစည်း အသီးသီးက ခေါင်းဆောင်တွေမှာ ပိုတာဝန်ရှိပါတယ်။
ဗိုလ်ချုပ်သိန်းစိန်က ကမ္ဘာ့စီးပွါးပျက်ကပ်ကို တရုပ်၊ အိန္ဒိယအားကိုးနဲ့ လျော့တွက်နေတယ်။ တရုပ်နဲ့ အိန္ဒိယတို့မှာ နေ့စဉ်နဲ့အမျှ ပြသနာတွေက ဒီရေလိုတက်လာနေလေတော့ အဲဒီက ရိုက်ခတ်မှုကြောင့် နဂိုက မ၀ရေစာစားနေရတဲ့ ကျုပ်တို့ ပြည်သူတွေသာ အငတ်ဘေးဆိုက်ကြမှာ ဗိုလ်ချုပ်မင်းတွေကတော့ တယောထိုး ပျက်မဲ့ ပုံမပေါ်ပါဘူး။ နာဂစ်တုန်းက မြစ်ဝကျွန်းပေါ်က ရေမြောနေတဲ့ အလောင်းကောင်တွေပေါ်မှာ ဖွဲ့စည်းပုံ အခြေခံဥပဒေကို အသဲမာမာနဲ့ အတည်ပြုခဲ့တဲ့ သာသနာပြုမင်းများက ကမ္ဘာ့စီးပွါး ပျက်ကပ်ကြောင့် တစ်နိုင်ငံလုံး အငတ်ဘေးဆိုက်နေရင်လဲ မျက်နှာပြောင်ပြောင်နဲ့ ထီးဖြူအုပ် မင်းလုပ်ဖို့ ဘိသိက်ခံကြအုံးမှာပါ။
နေမြင့်လေ အရူးရင့်လေဖြစ်နေတာမို့ အဖွဲ့အစည်းအသီးသီးက ခေါင်းဆောင်ကြီးများကို တင်ပြလိုတာက အဖွဲ့အစည်းစွဲ၊ နေရာစွဲ၊ အယူဝါဒစွဲ၊ ပုဂ္ဂိုလ်စွဲတွေ ဘေးချိတ်ပြီး ညီညွတ်ဖို့ လိုပြီ။ ပြင်စရာရှိလျင် ပြင်ရဲဖို့ လိုပြီ။ လုပ်နည်းလုပ်ဟန် သစ်တွေ ရှာကြဖို့ လိုပြီ။ လိုအပ်လျှင် ခေါင်းဆောင်ပိုင်းမှာ သွေးသစ်လောင်းဖို့ လိုပြီ။
လေးစားစွာဖြင့်
အောင်တင်
No comments:
Post a Comment