.

.

.

March 11, 2009

ပြည်သူလူထုနှင့် တပ်မတော်သား အားလုံးအတွက် အလွန်လိုအပ်နေတဲ့ ဒီမိုကရေစီ - အပိုင်း(၁၅)

ဒီမိုကရေစီ နဲ့ တပ်မတော် - အပိုင်း (၁၅)

ဆောင်းပါးရှင် - ဗိုလ်မှူး ကျော်ကျော်ခိုင်

ဒီမိုကရေစီ စနစ်တွင် လက်ရှိ အဖွဲ့များထက် ပြည်သူလူထု၏ ဆန္ဒသည် အဓိက ဖြစ်သည်ကိုလည်း လက်ခံ ရပေမည်။ နိုင်ငံတော်အား ကောင်းစွာ ဦးဆောင်မှု ပေးနိုင်စွမ်း ရှိပါက မည်သည့် လူမျိုးစုမဆို နိုင်ငံတော် သမ္မတ/ ၀န်ကြီးချုပ် နေရာ၌ ခန့်အပ်ခြင်း ခံရပေမည်။ ဗမာ တိုင်းရင်းသား မဟုတ်၍ မဖြစ်ရဟု မရှိနိုင်ချေ။ တချိန်က နိုင်ငံတော် သမ္မတ စပ်ရွှေသိုက်၊ မန်းဝင်းမောင်၊ ဆမားဒူးဝါးဆင်ဝါးနောင် (ရည်ရွယ်ပြီး) တို့ ရှိခဲ့ဖူးပါသည်။

ထို့အတူ ပြည်နယ် အစိုးရများလည်း ပြည်နယ်အတွက် သင့်တော်၍ ပြည်သူလူထုက ရှေးချယ်ပါက ရှမ်းပြည်နယ် အစိုးရမှာ ကချင်၊ ကယား၊ ကရင်၊ ချင်း လူမျိုးစုများ ဖြစ်နိုင်သလို ရခိုင်ပြည်နယ် အစိုးရမှာလည်း မွန်၊ ဗမာ၊ ရှမ်း၊ ကချင်၊ ကရင် ဖြစ်နိုင်သည်။ ရခိုင်ပြည်နယ်မို့ ရခိုင်လူမျိုး၊ ရှမ်းပြည်နယ်မို့ ရှမ်းလူမျိုးဟု သတ်မှတ်၍ မရပေ။ ဤသည်မှာ ဒီမိုကရေစီ ဖြစ်သည်။ ပြည်သူလူထု၏ ဆန္ဒသဘောထား ပဓာန ဖြစ်သည်။ အရည်အချင်းကို အဓိကထားသော လူမှုရေး စနစ်လည်း ဖြစ်သည်။ အမေရိကန် နိုင်ငံ၌ ယနေ့ ဖခင် ကင်ညာလူမျိုးနှင့် မိခင် အမေရိကန်မှ မွေးသော မစ္စတာ အိုဘားမား က သမ္မတ ဖြစ်လာသည်ကို အတုယူ မြင်တွေ့နိုင်သည်။ ကမ္ဘာတ၀ှမ်းလုံးက ဂုဏ်ယူချီးကျူး ထောပနာ ပြုကြရသည်။ ဒီမိုကရေစီ ကျင့်စဉ်ကို ကောင်းစွာ ရင့်ကျက်သော သဘောထားများနှင့် ပြုစုပျိုးထောင်နိုင်ခဲ့ကြ၍သာ ဤအခြေအနေ ဖြစ်ပေါ်လာ ရခြင်း ဖြစ်၏။ ကျွန်တော်တို့ အနေနှင့် မျက်ကန်းမျိုးချစ်များ လုပ်နေ၍ မရတော့ပါ။

အမေရိကန် ပြည်ထောင်စု ကဲ့သို့ စံပြ ဒီမိုကရေစီ ဖက်ဒရယ် နိုင်ငံကြီးပင်လျှင် စတင်ဖွဲ့စည်းကာစက ဖက်ဒရယ် ဖြစ်သော်လည်း ပြည်သူလူထုအားလုံး တစိတ်တ၀မ်းတည်း ဖြစ်လာပြီး၊ ပညာရေး၊ စီးပွားရေး၊ နိုင်ငံရေး၊ လူမှုရေးများ တည်ငြိမ်၍ ကောင်းမွန်တိုးတက်လာသော အချိန်၌ ပြည်ထောင်စုဆိုသော်လည်း ပြည်နယ်များ အာဏာရှိမှုကို မပျက်စေပဲ ဗဟို အစိုးရ အာဏာကိုလည်း တပြည်ထောင်ဟု ကမ္ဘာက ထင်မှတ်ရလောက်အောင် ထားရှိစေခဲ့သည်ကိုလည်း တိုင်းရင်းသား အဖွဲ့ခေါင်းဆောင်များ အပါအ၀င် ပြည်သူလူထုကြီးက သဘောပေါက် ခဲ့ပြီး ဖြစ်ပါသည်။

အမျိုးသား ဒီမိုကရေစီ အဖွဲ့ချုပ်၏ တိုင်းရင်းသား လူမျိုးများ အရေးနှင့် စပ်လျဉ်း၍ ထားရှိသော သဘောထားကို ဗဟုသုတ အဖြစ်တင်ပြချင်ပါသည်။
  1. ပြည်ထောင်စု မြန်မာနိုင်ငံတော်သည် အာရှအလယ်ပိုင်း ကုန်းခြေမှ ဆင်းသက် ပေါက်ဖွား လာကြသည့် တိုင်းရင်းသား လူမျိုး၊ မိသားစုဝင်များဖြင့် ပေါင်းစပ် ဖွဲ့စည်းထားသော နိုင်ငံတနိုင်ငံ ဖြစ်ပါသည်။ ကချင်၊ ကယား၊ ကရင်၊ ချင်း၊ ဗမာ၊ ရခိုင်၊ ရှမ်း အစရှိသည့် တိုင်းရင်းသား လူမျိုးများ လူမျိုးစုများ၏ အမိမြေသည် မြန်မာနိုင်ငံသာလျှင် ဖြစ်ပေသည်။
  2. သို့ဖြစ်ရာ လူမျိုးတမျိုးနှင့် တမျိုး၊ လူမျိုးစု တစ်စုနှင့် တစ်စုတို့သည် အပြန်အလှန် ယုံကြည်မှု ရှိကြရန် တန်းတူရည်တူ ဆက်ဆံကြရန် အရေးကြီးပေသည်။ လူမျိုးကြီး လူမျိုးငယ်ဟူသော ပြဿနာများ၊ တောင်ပေါ်မြေပြန့်ဟူသော အစွဲအလမ်းများကို အပြီးအပိုင် ဖျောက်ဖျက်ပြီး ပြည်ထောင်စု တခုအတွင်းမှ ပေါက်ဖွားလာသော ညီအကို တိုင်းရင်းသားများ အဖြစ် စွဲမြဲစွာ ခံယူအပ်ပေသည်။
ဤသဘောထားကို လက်တွေ့ အကောင်အထည် ဖေါ်ပေးမည့် ဒီမိုကရေစီကို တည်ဆောက်မည် ဖြစ်သော အမျိုးသား ဒီမိုကရေစီ အဖွဲ့ချုပ်ကို တိုင်းရင်းသားပြည်သူလူထု တရပ်လုံးက ယုံကြည်စွာ တခဲနက် ထောက်ခံမဲ ပေးခဲ့ကြပါသည်။ သို့သော်လည်း စစ်အာဏာရှင်တို့က အာဏာကို လက်နက်အားကိုး ပြီးသိမ်းပိုက်ထားသည်မှာ ယနေ့တိုင်ပင် ဖြစ်သည်။

တချိန်က နအဖက မြန်မာပြည်သူတို့သည် ဒီမိုကရေစီနှင့် မထိုက်တန်သေးဟူသော စကားနှင့် အမြင်မှာ အာဏာရှင်များ၏ အာဏာဆက်လက် ပိုင်ဆိုင်သိမ်းပိုက် ထားနိုင်ရေးအတွက် အကြောင်းပြချက်မျှသာ ဖြစ်သည်ကို ယနေ့ မျိုးဆက်သစ် တပ်မတော်သား အပေါင်း သိစေချင်ပါသည်။ ယနေ့ မျိုးဆက်သစ် တပ်မတော် ခေါင်းဆောင်များ အနေနှင့် မှန်ကန်သော လမ်းကို ရွေးချယ်ကြရပေတော့မည်။ မလွဲမသွေ စစ်အာဏာရှင် တစ်စုကို ဖယ်ရှားကာ တိုင်းပြည်သို့ အာဏာ ပြန်လည်အပ်နှင်းရပေလိမ့်မည်။

အသွင်ကူးပြောင်းကာလ တလျှောက် ထိုမျိုးဆက်သစ် တပ်မတော် ခေါင်းဆောင်များက နိုင်ငံတော် တည်ငြိမ်ရေးအတွက် အခန်းကဏ္ဍ တစ်ခုမျှ အချိန်အတိုင်းအတာ တရပ်အထိ ပူးပေါင်းပါဝင် တာဝန်ယူပေးပြီး၊ တပ်မတော် မူလ တာဝန်ကို ပြန်လည် ထမ်းဆောင် ရပေလိမ့်မည်။ နိုင်ငံတနိုင်ငံတွင် တပ်မတော် တစ်ရပ်သာ ရှိရမည်ဟု အမှန်ပင် ဖြစ်သည်ကို လက်ခံကြပါသည်။ အချိန်များစွာ မရှိတော့ပြီ ဖြစ်၍ ဤတာဝန်ကို ပြတ်ပြတ်သားသား ရယူရန် လို အပ်နေပေပြီ။

ထို့ကြောင့် စစ်အာဏာရှင်တခု ဖယ်ရှားရေး၊ တိုင်းပြည်ကို ဒီမိုကရေစီ နိုင်ငံအဖြစ် ကောင်းစွာ အသွင် ကူးပြောင်းပေးနိုင်ရန် အတွက် ဦးတင်ဦး (ဗိုလ်ချုပ်ကြီးဟောင်း သူရ တင်ဦး) နှင့် ဒေါ်အောင်ဆန်းစုကြည် ဦးဆောင်သော နိုင်ငံရေး ပါတီနှင့် ဆက်စပ် ပူးပေါင်းဆောင်ရွက်ရေး၊ ထိုခေါင်းဆောင်ကြီးများ၏ ဘေးအန္တရာယ် လုံခြုံရေး၊ ပြည်သူလူထု၏ အားပေးထောက်ခံမှု ရရှိရေးနှင့် ရပ်ရွာလုံခြုံရေး စသည်တို့ကို မဟာဗျူဟာ တရပ် ရေးဆွဲ၍ အမြန်ဆုံး အကောင်အထည်ဖေါ်ရန် တိုက်တွန်းလိုပေသည်။ ပြည်သူလူထု အနေနှင့်လည်း ရဟန်း သံဃာတော်များ ကံဆောင်ခဲ့ကြသည့် နည်းတူ စစ်အစိုးရကို စုပေါင်းကံဆောင်ကြဖို့ အချိန်တန်ပြီ ဖြစ်၏။


ဆက်လက်၌ အလျဉ်းသင့်သလို ဒီမိုကရေစီ သဘောတရားဖြစ်သော လူ့အခွင့်အရေးဆိုင်ရာများ၊ ဒီမိုကရေစီ ထူထောင်ရာ၌ သတိပြုရန်များနှင့် ပေါ်ပင် နိုင်ငံရေး လုပ်စားသူ တောကြောင်များ၊ အချောင်သမားများ၊ ပါးစပ်နှင့် လုပ်စားကြမည့်သူများအကြောင်း၊ နိုင်ငံတကာ ဒီမိုကရေစီ တိုက်ပွဲများ အကြောင်း၊ ပြည်သူလူထု တစ်ရပ်လုံးကို ဒီမိုကရေစီ ပညာပေး လုပ်ငန်းများ လုပ်ဆောင်ရေး လိုအပ်ချက်များ အကြောင်း ဆက်လက် တင်ပြသွားပါမည်။

No comments: