VOA မြန်မာပိုင်း “တပ်မှူးတပ်သား ပြောစကား”
အစီအစဉ် - (၄ - က)
အငြိမ်းစား ဗိုလ်ချုပ်ကြီး သူရဦးတင်ဦး
ရန်သူရဲ့ တိုက်ခိုက်ခံနေရသည့်အတွက်ကြောင့် မူလပုံစံအတိုင်း ပြည့်စုံစွာ မဖေါ်ပြနိုင်တာကို ခွင့်လွှတ်နားလည် ပေးစေလိုပါတယ်။ ဝက်ဘ်ဆိုဒ် ပြန်လည် ကောင်းမွန်လာပါက ပြည့်စုံစွာ ဆက်လက် ဖေါ်ပြပေးသွားပါမယ် ခင်ဗျာ။
ဦးရော်နီညိမ်း။ ။ မြန်မာနိုင်ငံမှာ (၁၉၅၄) ခုနှစ်လောက်က စပြီးတော့ အာဏာရ ဖဆပလပါတီကြီးထဲက ဆိုရှယ်လစ်ခေါင်းဆောင်တွေနဲ့ နီးစပ်တဲ့ ဗမာ့တပ်မတော်ထဲက တပ်မှူးကြီးတွေ ပါတီနိုင်ငံရေးမှာ ပါဝင်လာခဲ့ပုံ၊ (၁၉၅၆) ခုနှစ် ဖဆပလပါတီကြီး အကွဲအပြဲရဲ့နောက်ပိုင်း ဆိုရှယ်လစ်ခေါင်းဆောင် တွေရဲ့ တည်မြဲဖဆပလ ရွေးကောက်ပွဲမှာ အနိုင်ရရေး တပ်မှူးကြီးတွေရဲ့ကြိုးပမ်းခဲ့မှုမှာ သူကိုယ်တိုင် တပ်မှူးငယ်တစ်ဦးအနေနဲ့ တက်တက်ကြွကြွပါဝင်ခဲ့ပုံတွေ၊ အဲဒီအတွက် နောက်ပိုင်းမှာ ဖြစ်ပေါ်လာတဲ့ အကျိုးဆက်တွေကို အငြိမ်းစား ဗိုလ်ချုပ်ကြီးသူရဦးတင်ဦးနဲ့ ဆက်သွယ် ဆွေးနွေးမေး မြန်းခဲ့တာတွေကို တင်ဆက်ပေးလိုက်ပါတယ် ခင်ဗျာ။
ဦးတင်ဦး။ ။ တပ်မတော်သားတွေဟာ ပေါ့လေ နိုင်ငံရေးကတော့ စားဝတ် နေရေးထိုင်ရေး၊ နိုင်ငံရေးအကြောင်း တော့ သိရ မြင်ရမှာပေါ့။ သို့သော်လည်းဘဲ ပါတီအဖွဲ့အစည်းနဲ့ပတ်သက်တဲ့ အကျိုး စီးပွားအတွက်ကို ဒီလက်နက် အင်အားကိုအသုံးချပြီးတော့၊ ၀င်ရောက်ပြီးတော့ ဆောင်ရွက်တာမျိုး မရှိရဘူး ဆိုတာကိုလည်းဘဲ အရင်တုန်းက ကျနော်တို့ (၁၉၅၁) ခုနှစ် ရွေးကောက်ပွဲ၊ (၁၉၅၄) ခုနှစ်၊ (၅၅) ခုနှစ်ရွေးကောက်ပွဲတို့မှာ၊ ကျနော်တို့ War Office Council Order ပေါ့ ဗျာ။ အဲဒါနဲ့ သေချာ ကြပ်ကြပ်မတ်မတ် ထုတ်ထားတာ ရှိတယ်။ အဓိပ္ပါယ် ကတော့ဗျာ။ လွတ်လွတ် လပ်လပ် မဲပေးနိုင်တယ်။ လွတ်လွတ်လပ်လပ် ကျနော်တို့ ကိုယ်လိုလားတဲ့ ပုဂ္ဂိုလ်ကို ထောက်ခံနိုင်တယ်၊ စသည်ဖြင့် ဒါတွေကတော့ ရှိတယ်။
အငြိမ်းစားဗိုလ်ချုပ်ကြီး သူရတင်ဦး
တပ်မတော်သားတွေဟာ ပြည်သူလူထုရဲ့ကြားထဲမှာ အင်မတန်ကြည်ညိုဖွယ်ရာ ဖြစ်ခဲ့ပါတယ်ဗျာ။ ဟို ပျိုတိုင်း ကြိုက်တဲ့ နှင်းဆီခိုင်လို့ဆိုရမှာပေါ့။ ဒါပေမယ့်လို့လည်း ဗျာ။ ကျနော်တို့လည်း နိုင်ငံရေးထဲ ပါခဲ့တာပေါ့။ စပြီးတော့ ကျနော်တို့ (၅၄) ခုနှစ်တုံးက နည်းနည်းပါလာပြီဗျ။ အဲတော့ ကျနော်တို့တတွေလဲ ဘာပြော ပြော အထက်က အမိန့်နဲ့ လုပ်ကိုင်ပေးရတဲ့ကိစ္စတွေကလည်း ရှိခဲ့တယ်။ ဘာလို့လည်းဆိုတော့ သံယောဇဉ်ရှိတဲ့သူကို သွားလုပ် ကိုင်ပေးတာပေါ့ ဗျာ။ အဲဒီမှာ နဲနဲ တပ်ကိုအသုံးချတဲ့ သဘောရှိတယ်။ အဲဒီအခါမှာ တပ်က ခုနက ရှိခဲ့တဲ့ အစဉ်အလာကောင်းကြီးကို ဖျက်ပြီး ၀င်ပြီးတော့ နိုင်ငံရေးအရ တစိတ်တပိုင်း ပါကြတာတွေ ရှိခဲ့တာက စပျက် တာပဲ ဗျ၊ အဲဒီတုံးကတော့ဖြင့် တခါတည်း ဟုတ်တယ်လိုလို မှန်တယ်လိုလို ကောင်းသလိုလိုနဲ့ပေါ့။ တကယ်က တော့ အဲဒီမှာ စပြီးတော့ ပျက်စပြုလာတာနော်။
ပထမက သူတို့က ဆိုရှယ်လစ်ချင်း ဆိုရှယ်လစ်ချင်းဆိုတော့ နီးစပ်တဲ့သဘောတွေ ရှိတော့ကာ အဲဒါ နောက်ဆုံး ကျနော်တို့ (၅၈) လို့ ပြောရမှာပေ့ါ။ ကျနော်တို့ Caretaker Government (အိမ်စောင့်အစိုးရ) က။ (၅၈) လောက်ကျတော့ ကြံ့ခိုင်ရေးအသင်းတွေဖွဲ့တယ် ဗျ။ ကျနော် ရခိုင်မှာ တပ်ပေါင်းစုမှူး လုပ်ပြီး ကြံ့ခိုင်ရေးအသင်း ဖွဲ့ရတယ်ဗျ။ ကျနော်တို့ Mythical၊ Mythical Lion (စိတ်ကူးထဲမှာရှိသော ခြင်္သေ့) မဟုတ်ဘူး ဗျ။ တကယ့် ခြင်္သေ့ရုပ် ဗျ။ ခြင်္သေ့ရုပ်မှာ တကယ့် မာန်ဖီနေတဲ့ ခြင်္သေ့ရုပ်နဲ့ ကြံ့ခိုင်ရေးအသင်းတွေ ထောင်ရတယ် ဗျ။ ကျောင်းသားတွေရော လူငယ်တွေရော အကုန်လုံးထောင်ရတယ်။ ကြံ့ခိုင်ရေးအသင်းတွေနဲ့ ပတ်သက်လို့ တခါထဲ ကျနော်တို့ လက်မှတ်တွေပေးတယ်။ သူ့ခေတ် သူ့အခါ အခွင့်အရေးတွေ ပေးပြီးတော့ ကြံ့ခိုင်ရေး အသင်းတွေ ဖြစ်လာကြတာပေါ့ ဗျာ။ အုန်းအုန်းကျက်ကျက်ပေါ့ ဗျာ။ တခါထဲ ရွာတွေကို ခြံစည်းရိုးတွေခတ် နောက်ပြီးတော့ တကယ့် ကြိုးဆွဲတွေကို သေနတ်တွေထုတ်ပေး။ ဟိုခေတ်ဟိုအခါ ရနိုင်တဲ့အခွင့်အရေးတွေ ပေးပြီးတော့ စည်းရုံးကြတာပေါ့ ဗျာ။ စည်းရုံးပြီးတော့ ဒီ အင်အားတွေ အားကိုးတာပေါ့ဗျာ။ ဟို ၀န်ထမ်းအားကိုး။
ဦးရော်နီညိမ်း။ ။ ဟုတ်ကဲ့။ အဲဒီအချိန်မှာ အန်ကယ် တပ်မဟာမှူး ဖြစ်နေပြီ။ တိုင်းမှူးလည်း ဖြစ်ခါနီးပြီ။ အဲဒီအချိန် မှာ အဲဒီ ကြံ့ခိုင်ရေးဆိုပြီးတော့ ဒီလိုမျိုး လုပ်ခိုင်းတဲ့ဟာပေါ့ နော်။ ဒီCaretaker Government လက်ထက် အောက်မှာ။ အန်ကယ်၊ အဲဒီတုံးက တပ်မဟာမှူးအနေနဲ့ အသက်ကတော့ ငယ်သေး တာပေါ့။
ဦးတင်ဦး။ ။ ဟုတ်ကဲ့၊ သုံးဆယ့်နဲ့ နှစ်နှစ် ဗျ။
ဦးရော်နီညိမ်း။ ။ ဟုတ်ကဲ့၊ အန်ကယ်၊ အဲဒီတော့ ဘယ်လို ထင်မြင်ယူဆလဲ။ အန်ကယ်၊ ဒီ ကြံ့ခိုင်ရေးလုပ်တဲ့ ကိစ္စ ကို။
ဦးတင်ဦး။ ။ ဟာ အဲဒီတုံးကတော့ ဒီလိုလေ။ တက်တက်ကြွကြွပေါ့ ဗျာ။ တခါထဲ ဒို့ ဆရာသမားကြီးတွေက ခိုင်းတယ်ဆိုတဲ့ အနေနဲ့ပေါ့ ဗျာ။ ဒါကတော့ အောက်က တပ်မှူးတစ်ယောက်အနေနဲ့ တက်တက် ကြွကြွ လုပ်ရတာပေါ့ ဗျာ။ အဲဒါနဲ့ နောက်ဆုံးကျတော့ ဗျာ။ ဟို (၁၉၆၀) ခုနှစ်ရွေး ကောက်ပွဲ ရောက်လာတာပေါ့ ဗျာ။ အာဏာရှိနေတဲ့ ပါတီကြီးကပေါ့ ဗျာ။ အာဏာရှိခဲ့ဘူးတဲ့ ခေါင်းဆောင်တွေထဲက ပေါ့ ဗျာ။ “နိုင်လည်းနိုင်ရမယ၊် ရှုံးလည်းနိုင်ရမယ်” ပေါ့။ ဒီလိုဟာတွေက ဖြစ်လာတယ် ဗျ။ ဖြစ် လာပြီးတော့ အောက်က တပ်တွေဘာတွေကို ဒီလိုပဲ ကျနော်တို့ သူတို့နဲ့ ပါဝင်အောင် လုပ်ကြတဲ့အခါကျတော့၊ အဲဒီမှာ မှတ်မိသေးတယ် ဗျ။ နေဦး… ကျနော် ပြောရဦးမယ်။ ရွေးကောက်ပွဲမတိုင်ခင်မှာ ဓမ္မိက ဘသန်း၊ ဗိုလ်မှူးကြီးဘသန်း (ဘာသာပြန် “ယောနသံ ဇင်ယော်” စာအုပ်ရေးသား ခဲ့သူ၊ စာရေးဆရာ “ဓမ္မိကဘသန်း”) က Psychological Warfare (တပ်မတော် စိတ်ဓါတ်စစ်ဆင်ရေးညွှန်ကြားရေးမှူးရုံး) မှာ ညွှန်မှူး ဗျ။ သူ့ကို နယ်တွေမှာဆင်းပြီးတော့ ကျနော်တို့ နယ်တွေရဲ့ အခြေအနေကို ကျနော်တို့ သုတေသနစာတမ်း ပြုစုခိုင်းတယ် ဗျ။ အဲဒီတော့ ပြုစုခိုင်းတဲ့အခါကျတော့ စာတမ်းကြီးကို တခါထဲ သူက တင်လိုက်တယ်။ သူက သေချာ နှိုက်နှိုက်ချွတ်ချွတ် တင်တာမှာ ဒီ နယ်တွေမှာ ရှိနေတဲ့ တပ်မတော်သားတွေရဲ့ ကျနော်တို့ ဟို ဆိုးဝါးပုံတွေ၊ အနိုင်ကျင့်ပုံတွေ၊ လက်နက်နဲ့ ဗိုလ်ကျတာ တွေ၊ နောက် သူတို့နဲ့ပါတဲ့ အပေါင်းသင်းရောင်းရင်း ဖြစ်တဲ့ ကြံ့ခိုင်ရေးအသင်း တွေကနေပြီးတော့ ဒီလို ဖြစ်လာ တာတွေ စုံလို့ဗျာ။ အများကြီးပဲ အဲတော့ သူက သက်သေသက္ကာရတွေနဲ့  ပါတယ် ဗျ။
အဲဒီတော့ ပါလာတဲ့အခါကျတော့ ကျနော်တို့ရဲ့ အကြီးအကဲပုဂ္ဂိုလ်ကြီးပေါ့ ဗျာ။ သူ အဲဒီအဖိုးကြီး နည်းနည်း လန့်သွားတယ်။ လန့်သွားပြီးတော့ ဒါနဲ့ ကျနော်တို့တပ်မှူးတွေ အကုန်လုံးခေါ်ပြီးတော့ ပြောတယ် ဗျ။ အဲဒါကို ကျနော်တို့ သူ့ရဲ့အိမ်က Boat Club (အင်းလျားကန် ရွက်လှေကလပ်) မှာခေါ်ပြီးတော့ ကျနော်တို့တွေကို ညစာကျွေးရင်းနဲ့ ဒါနဲ့ ပတ်သက်တာ အားလုံးကို မင်းတို့ ဒီလိုဒီလို ထွက်လာပြီ။ ရွေးကောက်ပွဲမှာသာ ၀င်ပြီး ပါရင်တော့ဖြင့် တပ် သိက္ခာဟာ ကျဆင်းပြီးတော့၊ ဒလဟော သွားတော့မှာဘဲ။ ရပ်တန်းကရပ်လို့ ဒီလိုတော့ ပြောတယ်ဗျ။ ဒါပေမဲ့ တပ်မှူးတွေက အရှိန်လွန်နေပြီ။ သူပြောတဲ့အချိန်က အချိန်က တိုနေပြီ။ အဲဒီတော့ အပြင်ရောက်လာတဲ့ အခါကျတော့၊ သူကရပ်ခိုင်းတယ်၊ တို့က ဘာလို့ရပ်ရမှာလဲဆိုတဲ့ဟာတွေက ဖြစ်တယ်။ ဘယ်လိုဖြစ်လဲဆိုတော့ ကျနော်ပြောပြဦးမယ်နော်။ ရွေးကောက်ပွဲနေ့ကျ တော့ ကျနော်တို့ကလည်း သူရဲကောင်း ကြီးတွေပေါ့ ဗျာ။ တခါထဲကို (ဟွန်း) တခါထဲ။ ဟို ခေါင်းဆောင်ပြီး ရှေ့ကနေပြီးတော့ မဲပုံးမှာ ကျနော်တို့ နီတယ်ဆိုပြီး ကျနော်တို့က မဲတွေ ထည့်ပြလိုက်တယ် ဗျ။
အဲဒီမှာ တပ်ကရဲဘော်တွေ ဘာတွေရော ကြံ့ခိုင်ရေး အသင်းထဲက လူတွေကလည်း အကုန် အနယ်နယ်အလိုက် ၀ါတယ်ဆိုပြီးတော့ အကုန်ထည့်သွားတယ် ဗျာ။ အဲဒီတော့ ဘာပြလိုက်လဲဆိုတော့ တစ်ဘက်က ပြောတဲ့ ဥစ္စာက လမ်းနှစ်သွယ်ဘဲ။ ရွေးပါ။ တစ်သွယ်က အာဏာရှင်လမ်းစဉ်၊ တဘက်ကတော့ ပြည်သူလူထုဆန္ဒနဲ့တင်တဲ့ ပါလီမန်ဒီမိုကရေစီလမ်းစဉ်။ လမ်းခွရောက်နေပြီ။ အဲဒါကြောင့်မို့လို ပြည်သူပြည်သားပေးမဲ့ ပုဂ္ဂိုလ်တွေရဲ့ မဲဆန္ဒက အသဲကြားထဲက မဲတစ်ပြား။ ဘယ်သူ့ပေးမလဲဆိုတဲ့ တစ်ခွန်းပဲပြောတယ်။ အဲဒီအခါမှာ ကြံ့ခိုင်ရေး အသင်းကလူတွေကလည်း သူတို့ရဲ့ဂုဏ်သိက္ခာကို သူတို့ပြန်ပြီးတော့၊ သူတို့ရဲ့သိက္ခာကိုပြန်ဆယ်တဲ့အနေနဲ့ သူတို့ကိုယ်တိုင်ကပင်လျှင် ဦးနုကို ၀ါတယ်ဆိုပြီး ထည့်သွား ဘူးတာရှိတယ်ဗျ။ ဒါဟာ ဒီမိုကရေစီကို ရွေးတယ်ဆိုပြီးတော့ ရဲရဲဝံ့ဝံ့ လုပ်သွားတဲ့အတွက် အဲ့ဒီ တုံးက ကြံ့ခိုင်ရေးအသင်းရဲ့ဆောင်ရွက်မှုဟာ ကျနော်တို့ သမိုင်းမှာ ပြောင်ခဲ့တယ်ဗျာ။ ကြံ့ခိုင် ရေးအသင်းက အဲဒီလို ပြတ်ပြတ်သားသား ပြောင်ခဲ့တယ်။
တပ်မတော်သားတွေကလည်းဘဲ မှန်မှန်ကန်ကန်ဘဲ။ သူတို့ရဲ့ အသဲကြားထဲကမဲတစ်ပြားကို လွတ်လွတ်လပ်လပ် ပေးပိုင်ခွင့်ရှိခဲ့ တာကို မှန်မှန်ကန်ကန် အသုံးချပေးလိုက်တယ်ဆိုတဲ့ အခါကျတော့ ပြည်သူလူထုကလည်း မှန်မှန်ကန်ကန်ပေးလိုက်တဲ့ အခါကျတော့ ဦးနုက ပုံအောပြီး အပြည့်ရသွားတာပေါ့ ဗျာ။ ဦးနု ကလည်း သိတဲ့အတိုင်းဘဲ ဗျ။ သူကလည်းဘဲ သတ္တိ အင်မတန်ရှိတဲ့လူဘဲဗျ။ သူက ၀န်ကြီးချုပ် လုပ်နေတယ် ဆိုတာက ဟို သတ္တိမရှိဘဲနဲ့ လုပ်တာမှ မဟုတ်ဘဲ။ သူ့မှာ အင်မတန်ကို သူရသတ္တိ၊ ဓမ္မသတ္တိ အင်မတန် ဒီပုဂ္ဂိုလ်က ရှိတာ ဆိုတော့လည်းဘဲ ကျနော်တို့ပုဂ္ဂိုလ်ကလည်းဘဲ၊ ပုဂ္ဂိုလ်ကြီးကလည်း သိတယ်လေ။ သိတော့ အဲဒါနဲ့ ပတ်သက်တာအားလုံးကို သူက နောက်ဆုံး ဒါကို သွားပြီးတော့ မှားကြောင်းဘာကြောင်း ၀န်ခံပြီးတော့ပေါ့ ဗျာ။ အဲဒီမှာ သူက နောက်ဆုံး လုပ်ပြလိုက်တယ်။ အဲဒီလို လုပ်ပေးလိုက်တာဘဲလို့ ကျနော်က မြင်လိုက်တယ်လေ။ ဆိုတော့ ကိုယ့်တပ် ကိုယ်ပြန်နင်းသလို ဖြစ်သွားတာပေါ့ ဗျာ။
နောက်တစ်ပတ်တွင် ဆက်လက်ဖေါ်ပြသွားပါမယ်။
No comments:
Post a Comment