.

.

.

April 6, 2011

ကာကွယ်ရေးဦးစီးချုပ် (လေ) ဗိုလ်ချုပ်ကြီး မြတ်ဟိန်းသို့ ဂုဏ်ယူဝမ်းမြောက်ကြောင်း ဆုတောင်းလွှာ


ပြည်ထောင်စုသမ္မတ မြန်မာနိုင်ငံတော် အစိုးရအဖွဲ့သစ် စတင် ပေါ်ပေါက်လာသော ၃၀-၃-၂၀၁၁ ရက်နေ့တွင်ပင် တပ်မတော် (လေ) ၏ အမိအဖသဖွယ်ဖြစ်သော ကာကွယ်ရေးဦးစီးချုပ် (လေ) အား ဒုတိယဗိုလ်ချုပ်ကြီးအဆင့်မှ ဗိုလ်ချုပ်ကြီးအဆင့်သို့ တိုးမြှင့်ပေးလိုက်ကြောင်း ကြားသိရသည့်အတွက် လေတပ်သားများ အားလုံးက အထူးပင် ၀မ်းမြောက်ဂုဏ်ယူမိပါကြောင်း စည်းလုံးခြင်းရဲ့အင်အား ဝက်ဘ်ဆိုဒ်မှ တင်ပြလိုက်ရပါသည်။ နေပြည်တော်အိမ်မှ ပြောင်းရွှေ့ရတော့မည်ဟု ပစ္စည်းများ သိမ်းထားရာမှ မထင်မှတ်ပဲ နောက်တပွင့်တိုးကာ ဗိုလ်ချုပ်ကြီး ဖြစ်သွားခြင်းအတွက် ဆရာ စိန်မျက်ခုံး ကိုယ်တိုင်လည်း ၀မ်းသာပီတိ ဖြစ်နေမည်ထင်ပါသည်။ လေတပ်ထဲမှ ရင်ဖွင့်သံများကိုလည်း နားမဆန့်အောင် ကြားသိပြီး ဖြစ်လိမ့်မည် ထင်ပါသည်။ မသိချင် မကြားချင်ယောင်ဆောင်နေစေကာမူ ရင်ဖွင့်သံ ဆောင်းပါးများအားလုံးကို Print ထုတ် ဖတ်ရှုပြီးဖြစ်သလို သက်ဆိုင်သူ၊ ပတ်သက်သူဟု ယူဆသူ မှန်သမျှကိုလည်း ရှင်းလင်းနှိပ်ကွပ်ခဲ့ရာ စစ်သည်များ မဆိုထားနှင့် အရာရှိများသည်ပင် အင်တာနက်သုံးရန် ကြောက်လန့်နေခဲ့ကြပြီ ဖြစ်ပါသည်။

သို့သော်လည်း လေတပ်ထဲမှ မတရားမှုများ၊ မညီမျှများ၊ အက်ကွဲသံများ၊ ရင်ဖွင့်သံများသည် မှန်ကန်သော အဖြေတရပ် မပေါ်မချင်း တစိမ့်စိမ့် ထွက်ပေါ် ပေါက်ကွဲ နေဦးမည်သာ ဖြစ်ပါသည်။ ယနေ့ တပ်မတော် (လေ) တွင် လေတပ်စခန်း အသီးသီးရှိ စစ်သည်များ၊ အရာရှိများ၊ မိသားစုများ၏ ရင်ထဲမှ ခံစားချက်အမှန်များ၊ ဖြစ်စဉ်အမှန်များကို မြင်အောင်၊ သိအောင် ကြိုးစားဆောင်ရွက်ရန် အခြေအနေ ပေးနေပါပြီ။ လေတပ်၏ အမိအဖသည် ဆရာဗိုလ်ချုပ်ကြီးသာ ဖြစ်ပါသည်။ တိုင်းမှူးများ၏ နှိပ်ကွပ်မှုအောက်မှ လေတပ်စခန်း အသီးသီးသည် ပျံသန်းရေး တာဝန်များထက် မယောင်ရာဆီလူးသော အုပ်ချုပ်မှုကိစ္စများ၊ ပျံသန်းရေးကို ထိခိုက်စေသော အခြားလုပ်ငန်းများတွင် နစ်မွန်းနေကြသည်ကို ပြန်လည်သုံးသပ်ကာ နိုင်ငံရေးမှ လွတ်ကင်းသော အချိန်အခါသစ်တွင် တပ်မတော် (လေ) ၏ နေရာတစ်ခုကို ပြန်လည် ရယူပေးသင့်ပါသည်။ ခွက်ပျောက်နေသော အရာရှိများ (မျှော်လင့်ချက် မရှိတော့သော ဒုဗိုလ်မှူးကြီးများမှသည် လေသူရဲမဟုတ် အင်ဂျင်နီယာ မဟုတ်သော သစ်ကိုင်းလွတ် ဗိုလ်မှူး/ဗိုလ်ကြီးများအလယ် လေသူရဲပြုတ်ကာ အုပ်ချုပ်ရေးရောက်နေရသော ဒုဗိုလ်များအထိ) ၏ ဘ၀ကို ပြန်လည်စဉ်းစားပေးခြင်း၊ စစ်သည်များ၏ အဆင့်တိုးမြှင့်ရေး၊ ပြောင်းရွှေ့ရေး ကိစ္စများတွင် မျှတမှု ရှိစေရေး၊ (အဝေးတပ်များတွင် လူစားထိုးရန်မရှိဟုဆိုကာ နှစ်များစွာ ပို့ထားသောကိစ္စများ၊ လေတပ်စခန်း တစ်ခုတည်းတွင်သာ သေသည်အထိ မပြောင်းရအောင် ကြံဖန်တွယ်ကပ်နေသော အရာရှိ/စစ်သည်များအား ကျောသားရင်သား မခွဲစတမ်းစီစစ်ခြင်း စသော) စနစ်တကျ မူဝါဒ ချမှတ် ဖော်ဆောင်ခြင်းတို့ ဆောင်ရွက်ခြင်း၊ ခါးဆက် ပြတ်လုနီးဖြစ်နေသော စက်မှုလက်မှုဌာနခွဲအောက်မှ လုပ်ငန်းအချို့ (ပုံဆွဲ၊ ဓါတ်ပုံ၊ လေယာဉ်သက်ကယ်အကူ စသော) တို့ကို ခေတ်နှင့်လျော်ညီစွာ ပြန်လည်သုံးသပ် စုဖွဲ့ခြင်း၊ ရဟတ်ယာဉ် လေသူရဲတို့အတွက် လေယာဉ်အမျိုးအစားသစ် စဉ်းစားပေးခြင်း စသည်တို့မှသည် များပြားလှသည့်ရင်ဖွင့်ကြသော၊ ခံစားကြသော၊ မျိုသိပ်ထားကြသော တပ်မတော် (လေ) ၏ အက်ကြောင်းများစွာကို ဖာထေးပြင်ဆင်ရန် ဗိုလ်ချုပ်ကြီး၏ အပွင့်များက တွန်းအား ဖြစ်စေချင်ပါသည်။

မည်သူ့ကိုမှ မယုံသော၊ တင်ပြချက်များကို သံသယစိတ်ဖြင့် နားထောင်သော၊ အချက်အလက်မှန်သမျှ သိထားအောင် စုထားသော (အချက်အလက်အများစုမှာ ဆရာကြောက်သော တပည့်များ၏ လိမ်ဆင်များဖြစ်နေခြင်း)၊ မှန်သည်ထင်လျှင် စနေသားပီသစွာ ဇွတ်လုပ်သော နှစ်ဟောင်းနှင့် အဆင့်ဟောင်းမှ အကျင့်ဟောင်းများကို ပြင်ဆင်ကာ၊ တပည့်သားသမီးများအပေါ် စာနာစိတ်ထားပြီး မိသားစုပိုင် (သားဖြစ်သူစိုင်းစိုင်း ရှယ်ယာဝင်ထားသော) စီးပွါးရေးလုပ်ငန်းများ တိုးတက်အောင်မြင်သည့်နည်းတူ တပ်မတော် (လေ) ၏ ကောင်းရာကောင်းကျိုးကို ဆထက်တန်ပိုး တိုးတက် ထမ်းဆောင်နိုင်စေကြောင်း ဆုမွန်ကောင်းတောင်းကာ ဂုဏ်ပြုအပ်ပါသည်။

လေတပ်မှ အရာရှိ စစ်သည်များ

No comments: