ရန်ကုန်တိုင်း စစ်ဌာနချုပ် လက်အောက်ခံ တပ်ရင်းတပ်ဖွဲ့များအပေါ် တိုင်းစည်းရုံးရေး ကော်မတီအနေဖြင့် ကျားကန်ပြီး အနိုင်နိုင် စည်းရုံးနေရကြောင်း ဆက်တိုက် သတင်းတင်ပေးလျက်ရှိရာ (စည်း/ကော်) အစည်းအဝေးမှာ ရန်ကုန်တိုင်း စစ်ဌာနချုပ်တိုင်းမှူး ဗိုလ်မှူးချုပ်ထွန်းသန်းရဲ့ အဖွင့်မိန့်ခွန်း ကောက်နုတ်ချက်ကို စစ်ဘက်နီးစပ်သူများက စည်းလုံးခြင်းရဲ့အင်အားဝက်ဘ်ဆိုဒ်သို့ ဆက်လက်ပေးပို့လာပါတယ်။
အဲဒီ အစည်းအဝေးမှာ တိုင်းမှူးက ပြောကြားရာတွင် တပ်တွင်း စည်းလုံးညီညွတ်ရေး ဆောင်ရွက်ရာ၌ အထက်ဌာနက ဆောင်ရွက်ပေးရမည့် အပိုင်းများအနက် နိုင်ငံတော်နှင့် တပ်မတော်အပိုင်းမှ ကြိုးစား ဆောင်ရွက်ပေးမည်ဖြစ်ပြီး တပ်မှူးများ အနေဖြင့် မိမိတို့ဆောင်ရွက်ပေးရမည့် အပိုင်းကို ပြည့်ပြည့်ဝဝ ဆောင်ရွက်နိုင်ရေး စည်းရုံးရေးကော်မတီ အဆင့်ဆင့်ထံ ကြပ်မတ်ဆောင်ရွက်ပေးကြရန် လိုအပ်တယ်လို့ဆိုကြောင်း၊ တပ်မှူးအများစုဟာ သင်တန်းတက်ပြီး ရာထူးတက်ရေးကိုသာ စိတ်ဝင်စားနေတာကို တိုင်းမှူးကြီး မေ့နေဟန်တူကြောင်း၊ တပ်နေပျော်ရေးအတွက် တပ်တွင်း စည်းလုံးညီညွတ်မှု ဆောင်ရွက်ရာတွင် ရုပ်ပိုင်းဆိုင်ရာ အထောက်အပံ့ ပေးရုံဖြင့် မလုံလောက်ဘဲ စိတ်ပိုင်းဆိုင်ရာပါ ပြည့်စုံစေရန် တပ်မှူးများသည် မေတ္တာစေတနာ ပြည့်ဝပြီး ရဲဘော် ရဲဘက်စိတ်ရှိရှိဖြင့် မှန်မှန်ကန်ကန် ဆောင်ရွက်မှသာ ထိရောက် အောင်မြင်မည်ဖြစ်သဖြင့် စည်းရုံးရေးကော်မတီ အဆင့်ဆင့်က ကြပ်မတ် ဆောင်ရွက်ပေးကြရန် လိုအပ်ကြောင်း ပြောကြားခဲ့တယ်လို့ သိရှိရပါတယ်။ အမှန်တကယ်တော့ အူမတောင့်မှ သီလစောင့်နိုင်မယ်ဆိုတာ တိုင်းမှူးကြီး မေ့နေဟန်တူကြောင်း၊ ရှေ့တန်းတိုက်ပွဲတွေမှာ ရုပ်ဝတ္ထုဆိုင်ရာ ထောက်ပံ့မှု မပြည့်စုံသော်လည်း စိတ်ဓာတ်ရေးရာနှင့် ရဲဘော်ရဲဘက်စိတ်တို့ဖြင့် ထိန်းထားနိုင်ကြောင်း၊ နောက်တန်း ရန်ကုန်မြို့တော်ကြီးမှာတော့ လူနေမှုအဆင့်အတန်း မြင့်မားလာလို့ အစစအရာရာ နိမ့်ပါးနေတဲ့ အရာရှိစစ်သည်တွေရဲ့ ဆင်းရဲကြပ်တည်းမှုကို မဖြေရှင်းနိုင်သရွေ့ တပ်နေပျော်ရေး စီမံချက်မှာ အောင်မြင်မှာ မဟုတ်ကြောင်း စစ်ဘက်နီးစပ်သူများက သုံးသပ် ဝေဖန်ကြပါတယ်။
ဆက်လက်၍ သူက ပြောကြားရာမှာ တပ်မတော်၏ သဘောသဘာဝအရ အမိန့်ပေး စေခိုင်းရသော်လည်း မဖြစ်နိုင်သည့် အမိန့်ကို ပေးခြင်းဖြင့် စေခိုင်းသ သိက္ခာကျသလို မဆောင်ရွက်နိုင်သူလည်း အပြစ်ဖြစ်စေသဖြင့် ဆောင်ရွက်နိုင်/ ဖြစ်နိုင်သည့် ကိစ္စများကိုသာ တာဝန်ပေး စေခိုင်းနိုင်ရေး စည်းရုံးရေးကော်မတီ အဆင့်ဆင့်က ကြပ်မတ် ဆောင်ရွက်ပေးကြရန်လို့ ဆိုတဲ့အတွက် မညှာမတာခိုင်းနေတဲ့ စည်းရုံးရေးကော်မတီများကို သတိပေးနေဟန် ရှိပါတယ်။ ဒါကို ကြည့်ခြင်းဖြင့် အထက်အရာရှိများကလည်း မိမိ အမှုမပတ်ရေးအတွက် လက်အောက်ကို ကြိုးချီထားတဲ့အမိန့်များ ပေးနေတာကြောင့် လက်အောက်ကလည်း လိမ်ညာ ဖန်တီးဖို့ ဆိုက်ရောက်ရမဲ့ အဖြစ်မျိုး ရှိနေကြောင်း စစ်ဘက်နီးစပ်သူများက စည်းလုံးခြင်းရဲ့အင်အား ဝက်ဘ်ဆိုဒ်သို့ သတင်းပို့လာပါတယ်။
တိုင်းမှူးက ဆက်ပြောရာမှာ မိမိကွပ်ကဲမှုအောက်မှ အရာရှိများကို တာဝန်သိ၍ တာဝန်ယူလိုစိတ် ဖြစ်ပေါ်လာစေရန် ယုံယုံကြည်ကြည် တာဝန်ပေးအပ်၍ ဆုပေး၊ ဒဏ်ပေးစနစ် ကျင့်သုံးပြီး ထိန်းသိမ်း ကြပ်မတ်ခြင်းဖြင့် စိတ်ပိုင်း၊ ရုပ်ပိုင်း အရည်အချင်းပြည့်ဝသော ခေါင်းဆောင်များ ဖြစ်ပေါ်လာအောင် လေ့ကျင့်ပျိုးထောင်ပေးစေရေး စည်းရုံးရေးကော်မတီအဆင့်ဆင့်က အလေးထားဆောင်ရွက်ပေးကြရန် လိုအပ်တယ်လို့ ဆိုပြန်ကြောင်း၊ တကယ်တမ်းကြတော့ ဒဏ်ပေးတာရှိပြီး ဆုပေးတာ မကြားဖူးကြောင်း စစ်ဘက်နီးစပ်သူများက စည်းလုံးခြင်းရဲ့အင်အား ဝက်ဘ်ဆိုဒ်သို့ သတင်းပေးပို့လာပါတယ်။
No comments:
Post a Comment