စည်းလုံးခြင်းရဲ့အင်အားဝက်ဘ်ဆိုဒ်သို့ စစ်တပ်မှ ဒေသခံ ကျေးရွာလူထုကို စစ်ဆင်ရေး အကြောင်းပြုပြီး အဓ္ဓမ အနိုင်ကျင့်နေတဲ့ သတင်းများကို ဝိုင်းမော်မြို့နယ် ကဇူးကျေးရွာမှ လူထုနှင့် နီးစပ်သူများနဲ့ စစ်ဘက်နီးစပ်သူများက သတင်းများစုစည်း ပေးပို့လာပါတယ်။သတင်းအပြည့်အစုံမှာ စစ်တပ်က ၀ိုင်းမော်မြို့နယ်၊ ကဇူးကျေးရွာ၊ ဒဘတ်ယာန်ကျေးရွာနှင့် ဂါးရာယာန်ကျေးရွာများအား စစ်ဆင်ရေးနယ်မြေအဖြစ် သတ်မှတ်ပြီး ဇူလိုင်လ (၂၅)ရက် နောက်ဆုံးထားပြီး ရွာမှ ရွာသားများ ထွက်ခွာတိမ်းရှောင်ကြရန် အမိန့်ညွန်ကြားချက်ပေးခဲ့တယ်လို့ ရွာသားများက သတင်း ပေးလာပါတယ်။ တဖန် စစ်ဘက်နီးစပ်သူများက အဲဒီညွန်ကြားချက် ထုတ်ရတာဟာ အကြောင်းရင်းရှိပြီး သူတို့ရဲ့ စွပ်စွဲချက်က အဲဒီကျေးရွာတွေဟာ လုံခြုံရေး ဧရိယာအဖြစ် အကြောင်းပြပြီး သောင်းကျန်းသူများနှင့် ဆက်ဆံမှုရှိနိုင်တယ်လို့ ဆိုပါတယ်။ တကယ်တော့ တပ်ရင်းတွေဟာ လှုပ်ရှား စည်းရုံးဆောင်ရွက်ရမှာဖြစ်ပြီး ကျေးရွာလူထုကို လုံခြုံမှု အကာအကွယ်ပေးရမည့်အစား မြေပုံပေါ်တွင် တပ်အလှုပ်ပြကာ လိမ်ညာနေတာ ပေါ်လွင်နေတယ်လို့ စစ်ဘက်နီးစပ်သူများက ဝေဖန်ကြပါတယ်။
ယခု ဖြစ်စဉ်အရတပ်စွဲထားတဲ့ ခလရ (၄၇)နှင့် ခမရ (၃၁၈) တပ်စခန်းတို့ဟာ ကဇူးကျေးရွာမှ မိသားစု(၃၉)စုပိုင် စပါးတင်း(၁၅၉၀)၊ ဒဘတ်ကျေးရွာမှ စပါးတင်း (၈၀)၊ ဆမားဇုံနယ် နှစ်ခြင်းခရစ်ယာန်အသင်းတော်ပိုင် ဆန်(၁၅)တင်း၊ စပါးတင်း(၂၀၀)တို့ကို အတင်းအဓ္ဓမ လုယက်သိမ်းဆီးပြီး တပ်ရိက္ခာအဖြစ် ကြိတ်ခွဲစားသုံးနေကြောင်း စုံစမ်းသိရှိရပါတယ်။
ကဇူးကျေးရွာ၊ ဒဘတ်ယာန်ကျေးရွာ၊ ဂါးရာယာန်ကျေးရွာမှ ရွာသားများကို ဇူလိုင်လ (၂၅)ရက် နောက်ဆုံးထားပြီး ရွာမှထွက်ခွာတိမ်းရှောင်ရန် ခမရ (၃၁၈)တပ်ရင်းမှူးမှ တပ်စခန်းကို ညွှန်ကြားအမိန့် ပေးခဲ့သောကြောင့် ကျေးရွာများတွင် ရွာသူရွာသားများ မနေရဲတော့ဘဲ မြစ်ကြီးနား၊ ၀ိုင်းမော်မြို့သို့ ဒုက္ခသည်များအဖြစ် ထွက်ပြေးလာခဲ့ကြောင်း သိရှိရပါတယ်။ ရွာသားများရဲ့ တပိုင်တနိုင် ချွေးနဲစာဖြင့် မွေးမြူထားတဲ့ ကြက်၊ ဝက်၊ နွား နှင့် ဆိတ် တိရိစ္ဆာန်များကိုလည်း တပ်ရိက္ခာအဖြစ် ဖမ်းဆီးသတ်ဖြတ်စားသောက်ပြီး၊ အိမ်သုံးပစ္စည်း ကောင်းများကိုလည်း ဖေါက်ထွင်းလုယူ၊ သိမ်းဆည်းလျက်ရှိခဲ့လို့ ဝမ်းနည်းကြေကွဲဖွယ်ရာ ကြုံတွေ့နေရပါတယ်။
“အိမ်ရှင်မရှိတဲ့ အချိန်တွေမှာဆို ရွာမှာ မွေးမြူထားတဲ့ ကြက်၊ ဝက်၊ နွား နှင့် ဆိတ် အစရှိတဲ့ တိစ္ဆာန်တွေကိုလည်း သူတို့ ကြိုက်သလို သတ်ဖြတ်စားသောက်နေကြပါတယ် ဟု ဒေသခံပြည်သူတစ်ဦး မှ ပြောဆိုခဲ့ပါတယ်။
ဒါ့အပြင် ရွာသူရွာသား တချို့က ပြောကြရာမှာ “ကျွန်တော်တို့ဟာ မိုးရာသီမှာ ဆန်စပါး စိုက်ပျိုးရမည့်အစား ထွက်ပြေးနေရပြီး သိမ်းယူခံတဲ့ ဆန်၊ စပါးတွေဟာလည်း မနှစ်က မိသားစုအတွက် ဝမ်းစာချန်ထားတာဖြစ်လို့ တစ်ပူပေါ် နှစ်ပူဆင့် အရူးမီးဝိုင်းခံနေရကြောင်း ရင်ဖွင့်ကြပါတယ်။” ဒေသခံပြည်သူများအနေဖြင့် လယ်ယာမြေများကို ယခုမိုးရာသီမှာ ကောင်းမွန်စွာလုပ်ကိုင်နိုင်ခြင်း မရှိတဲ့အပြင် လက်ကျန် ဆန်စပါးများကိုသာ မှီတင်းနေထိုင်ရလို့ အဲဒီဆန်စပါးများအား အစိုးရတပ်များရဲ့ အတင်းအဓ္ဓမ သိမ်းပိုက်ခံရခြင်းကြောင့် လက်ရှိအခြေအနေမှာ စားဝတ်နေရေး အခက်အခဲများဖြင့် ကြုံတွေ့နေကြရတယ်လို့ သိရှိရပါတယ်။
အမှန်တကယ်တော့ စစ်ဘက်နီးစပ်သူများက အပြစ်မဲ့ ရွာသူရွာသား တွေဟာ နီးရာဓား ကြောက်ရပြီး မြေဇာပင် ဖြစ်နေရကြောင်း စည်းလုံးခြင်းရဲ့ အင်အား ဝက်ဘ်ဆိုဒ်ကို သတင်းပေးပို့လာပါတယ်။
No comments:
Post a Comment